Süßkind von Trimberg

Wâhebûf und Nichtenvint

Wâhebûf und Nichtenvint
tuot mir vil dicke leide:
her Bîgenôt von Darbiân,
der ist mir vil gevære.
des weinent dicke mîniu kint;
bœs ist ir snabelweide.
ez hât si selten sat getân
Iîzûf, diu fröidenbære.
in mînem hûs her Dünnehabe
schaffet mir ungeræte.
er ist zer welt ein müelich knabe:
ir milten, helfent mir des bœsewichtes abe,
er swechet mich an spise und ouch an wæte.

Ich var ûf der tôren vart
mit miner künste zwâre.
daz mir die herren nicht welnt geben,
des ich ir hof wil vliehen
und wil mir einen langen bart
lân wachsen grîser hâre:
ich wil in alter juden leben
mich hinnân fürwert ziehen,
mîn mantel der sol wesen lanc,
tief under einem huote
dêmüeteclich sol sin mîn ganc,
und selten mê gesingen hovelîchen sanc,
sît mich die herren scheident von ir guote.