Der Marner

Es hat du starke gotes kraft

Es hat du starke gotes kraft
mit wunderlicher meisterschaft
gecirgget wol der sternen kreis, den svnnen vnd die manen.
dv bist gebildet, mensche, nach im.
dv sitze, dv stant, dv wat, dv swim,
dv solt dich siner helfe niemer vreuenliche entanen.
sin hoehe, dú ist dir ze hoh,
sin wite ze breit, sin grunt ze tief, sin lenge sich dir lenget.
der erste mensche sin lere floch,
da von wart er vs paradyses froeiden her gepfrenget
in dirre werlte vnfroeiden kamer;
da von vns twinget noch des fluoches zange vnd sleht der hamer:
wir mvessen vnser spise in sweize von der erden ianen.