Hartmann von Aue

Maniger grüezet mich alsô
- der gruoz tuot mich ze mâze vrô -:
»Hartmann, gên wir schouwen
ritterlîche vrouwen.«
mac er mich mit gemache lân
und île er zuo den vrowen gân!
bî vrowen triuwe ich niht vervân,
wan daz ich müede vor in stân.
Ze vrowen habe ich einen sin:
als sî mir sint, als bin ich in;
wand ich mac baz vertrîben
die zît mit armen wîben.
swar ich kum, dâ ist ir vil,
dâ vinde ich die, diu mich dâ wil;
diu ist ouch mînes herzen spil.
waz touc mir ein ze hôhez zil?
In mîner tôrheit mir beschach,
daz ich zuo zeiner vrowen gesprach:
»vrowe, ich hân mîne sinne
gewant an iuwer minne.«
dô wart ich twerhes an gesehen.
des wil ich, des sî iu bejehen,
mir wîp in solher mâze spehen,
diu mir des niht enlânt beschehen.

Übersetzung:

Mancher begrüßt mich so - / und über diesen Gruß freue ich mich nur mäßig: /
»Hartmann, auf, hofieren wir / die vornehmen Damen.« /
Er soll mich in Ruhe lassen / und (alleine) zu den Damen eilen! /
Bei Damen traue ich mir nichts zuwege zu bringen / als lustlos vor ihnen zu stehen. ‘
Über die Damen habe ich folgende Meinung: / So wie sie zu mir sind, so bin ich zu ihnen. / Denn ich kann besser meine Zeit / mit Frauen verbringen, die nicht von Stand sind.
/ Wo ich auch hinkomme, da gibt es viele von ihnen, /
und da finde ich diejenige, die auch mich will: /
die ist dann auch die Freude meines Herzens. / Was nützt mir ein zu hochgestecktes Ziel?
In meiner Unerfahrenheit passierte es mir, / daß ich zu einer Dame sagte: /
»Herrin, ich habe mein ganzes Sinnen / auf Eure Liebe gerichtet.« /
Da wurde ich aber schief angesehen! Darum will ich, das sei euch klar gesagt, /
nach Frauen von solcher Art suchen, / die mich nicht auf diese Weise behandeln.